كانت عمتى اللة يرحمها من عشاق السينما زى حالاتنا وكانت دايما تقول الواد عمرو دة طالعلى فى موضوع حب السينما وياما قعدت معاها تحكيلى عن العلق اللى خدتها من جدى اللة يرحمة بسبب السيما واصرارها على الوقوف على باب السيما بعد افتتاح اى فيلم جديد عشان تاخد صور الممثلين الممضية منهم وكانت تقعد تفرجنى عليهم وهى فخورة وياما كانت تقعد تتناقش معايا فى افلام زمان باب الحديد وغزل البنات والعزيمة لحد ما جة اليوم الموعود اللى اتصدمنا فى بعض فية !!!!!!
كان عيد ميلادى ال19 وكان موافق نزول اول افلام يسرى نصراللة سرقات صيفية للسينما وحبت عمتى تحتفل بعيد ميلادى وتعزمنى للسينما وسابتلى اختيار الفيلم المهم انا قولت اهى جاتلى من عند ربنا بس المشكلة ان انا عارف ان نوعية الافلام دى مش بتحبها عمتى يعنى بتحب الافلام الرومانسية الاجتماعية الاكشن انما السيرة الذاتية والكلكعة بتاعت يوسف شاهين ويسرى نصر اللة صعب تقبلها
المهم قولت اعمل محاولة وقلتلها نروح سرقات صيفية ..قالتلى سرقات اية ؟! قلتلها صيفية يا عمتو ..قالتلى بطولة مين دة ؟! قولت اية السؤال الصعب دة الفيلم مافيهوش ابطال اقولها منحة البطراوى حتقوللى ابوك لابو السينما .. المهم لقيت نفسى باقول عبلة كامل وشوقى شامخ (ملحوظة ان عبلة كامل وشوقى شامخ فى الوقت دة كانو شبة معروفين يعنى طشاش كدة مش زى دلوقتى)
ردت قالتلى يابنى انا عايزة اعرف الابطال مش الكومبارس
ارتبكت وقولتلها يا عمتو مش عايز احرقلك الفيلم اهووو سرقات صيفية بحر ومايوهات وكدة فيلم روش يعنى (سورى يا جماعة انا ماقولتش روش ماكانتش الكلمة دى اتولدت اياميها انما قولت حاجة بنفس المعنى )
المهم اقنعت عمتى وخدتنى بعربيتها وقالتلى حنروح سينما اية .. قولتلها كريم 2 فى شارع عماد الدين وروحنا السينما ووقفت عمتى عايزة تشترى فشار .. فشار دة مش حيركب مع الفيلم خالص قولتله لا يا عمتو فشار اية مش ناقصة وجع بطن ..المهم ادتنى الفلوس عشان اقطع التذاكر وراحت اشترت شيكولاتة اهى ارحم من الفشار شوية واخيرا دخلنا السينما وعلى فكرة القاعة بتاعت كريم 2 دى كانت صغيرة بالنسبة للسينمات فى التمانينات قبل المولات وكدة
المهم قعدنا فى اخر صف على الشمال ودة دايما مكانى المفضل فى اى سينما وبعدين الدنيا ضلمت وبدأ العرض ومع التتر وبداية الفيلم حسيت بصدمة عمتى فتحت الشيكولاتة وقعدت تاكل فيها وهى مصدومة ولما جت اللقطة بتاعت ياسر وهو بيستحمى فى الترعة بصتلى وقلتلى بحر ومايوهات وكدة ؟؟؟!!! المهم الست كلت الشيكولاتة وبعدين راحت عليها نومة وكل شوية تقلق وتقوللى اللة يسامحك يا عمرو وبعدين تنام تانى وكل ما صوت الشخير يبدأ يعلى اديها كتف قانونى عشان الصوت.
المهم انا ماعرفتش اتفرج ع الفيلم وهى ماعرفتش تنام والفيلم خلص وطلعنا وقالتلى يعنى احنا لازم نتعلم عشان قبل مانخش السيما نبقى عارفين الفيلم اللى حندخلة وعدينا من قدام سينما ديانا وكان عليها امم خارجين من فيلم نادية الجندى .. بصتلى وقلتلى شايف الناس خارجة مبسوطة ازاى .. رديت قولتلها معلش ادينا بنتعلم وانا جوايا زعلان عشان ماعرفتش اتفرج ع الفيلم
المهم تانى يوم على طول نزلت الصبح حفلة الساعة 10 الصبح ودة برضة معادى المفضل للاستمتاع بالافلام ودفعت ال5 جنية (اة واللة 5 جنية عشان كريم كانت سينما سوبر وقتها) وقعدت فى نفس مكانى المفضل والسينما كانت رايقة واتفرجت ع الفيلم وانبهرت بيسرى نصراللة فى اول افلامة وبعد يومين دخلت الفيلم تانى وكان نفسى ادخل مرة كمان بس مالقتيش لان الفيلم اتشال بعد اسبوعين من عرضة
وبعد كدة لحد يومنا دة وانا من اكبر محبى سينما يسرى نصر اللة وحاولت مع عمتى انها تدخل معايا مرسيدس وحاولت اغريها بيسرا عشان كانت بتحبها انما مفيش فايدة.
بعد سنين لما جة لعمتى المرض البطال واخر مرة شوفتها فيها وهى داخلة العملية اللى ما خرجتش منها قولتلها يالة ياعمتو بقى قومى بالسلامة عشان عايزين ندخل السيما مع بعض ..ابتسمت بالعافية وقالتلى بحر ومايوهات وكدة برضة ودخلت العملية وما خرجتش وسابتلى كل مجلاتها وصورها الممضية من النجوم سعاد حسنى ونادية لطفى وعبد الحليم وماجدة لان ما كانش عندها ولاد غيرى كانت بتعتبرنى ابنها
اللة يرحمك يا عمتو كان نفسى تكونى معايا وانا باتفرج على جنينة الاسماك واللة العظيم كان حايعجبك المرة دى
